2014 წლის 04 ივლისის N3/1/583 განჩინებით განმწესრიგებელ სასამართლო სხდომაზე საქართველოს საკონსტიტუციო სასამართლოს პლენუმმა დაადგინა, რომ წარდგინების ავტორის - ბათუმის საქალაქო სასამართლოს - მიერ სადავოდ გამხდარი ნორმა ძალადაკარგულია, შესაბამისად ,,საკონსტიტუციო სამართალწარმოების შესახებ” საქართველოს კანონის მე-13 მუხლიას მე-2 პუნქტის მოთხოვნებიდან გამომდინარე (საქმის განხილვის მომენტისათვის სადავო აქტის გაუქმება ან ძალადაკარგულად ცნობა იწვევს საკონსტიტუციო სასამართლოში საქმის შეწყვეტას) შეწყდა საქმის წარმოება ბათუმის საქალაქო სასამართლოს N583 წარდგინებაზე - საქართველოს სისხლის სამართლის საპროცესო კოდექსის 159-ე მუხლის კონსტიტუციურობის თაობაზე.
საქართველოს საკონსტიტუციო სასამართლოს პლენუმმა განჩინებაში განმარტა, რომ საკონსტიტუციო სასამართლომ 2014 წლის 23 მაისს მიიღო გადაწყვეტილება N3/1/574 საქმეზე და საქართველოს მოქალაქე გიორგი უგულავას კონსტიტუციური სარჩელი დააკმაყოფილა, რითაც საქართველოს სისხლის სამართლის საპროცესო კოდექსის 159-ე მუხლის ნორმატიული შინაარსი არაკონსტიტუციურად ცნო და ძალადაკარგულად გამოაცხადა.
ამდენად საქართველოს საკონსტიტუციო სასამართლოს მიღებული გადაწყვეტილებით დადასტურდა ბათუმის საქალაქო სასამართლოს მოსამართლის წარდგინების და მასში ასახული ფაქტების საფუძვლიანობა.
|