სასამართლომ მიკაილ კადიევისა და რიზვან ომაროვის მიმართ განაჩენი დაადგინა

2014 წლის 6 მარტს  თბილისის საქალაქო სასამართლომ დაასრულა სისხლის სამართლის საქმის განხილვა ბრალდებულების მიკაილ კადიევისა და რიზვან ომაროვის მიმართ.   

მათ ბრალად ედებოდათ ცეცხლსასროლი იარაღის, საბრძოლო მასალის, ფეთქებადი ნივთიერებისა და ასაფეთქებელი მოწყობილობების მართლსაწინააღმდეგო შეძენა-შენახვა.

საქმის მასალების მიხედვით, ბრალდებულებმა გამოძიებით დაუდგენელ დროსა და ვითარებაში მართლსაწინააღმდეგოდ შეიძინეს 9 მმ კალიბრის მაკაროვის სისტემის პისტოლეტი-N TH 2340, ამავე კალიბრის 8 ცალი ვაზნა, 2253,83 გრამი ჰექსოგენის შემცველი ფეთქებადი ნივთიერება, 25 ცალი ელექტროდეტონატორი, რასაც ასევე მართლსაწინააღმდეგოდ ინახავდნენ ქ.თბილისში, ბოჭორმის ქუჩაზე მდებარე დროებით საცხოვრებელ ბინაში. 2013 წლის 13 ივნისს,  შსს კონტრტერორისტული ცენტრის თანამშრომელთა მიერ  ჩატარებული, ბრალდებულთა დროებითი საცხოვრებლის ჩხრეკისას, ზემოთხსენებული ცეცხლსასროლი იარაღი და საბრძოლო მასალა ამოღებულ იქნა მიკაილ კადიევის საწოლის მატრასის ქვევიდან, ხოლო ფეთქებადი ნივთიერება და ასაფეთქებელი მოწყობილობა რიზვან ომაროვის სხვა პირად ნივთებთან ერთად მისი კუთვნილი ჩანთიდან.

საქმის არსებითად განხილვისას ბრალდებულებმა  თავი არ სცნეს დამნაშავედ წარდგენილ ბრალდებაში. მოცემულ სისხლის სამართლის საქმეზე გაიმართა 15 სასამართლო სხდომა. დაიკითხა ბრალდების 17 და დაცვის 2 მოწმე.

თბილისის საქალაქო სასამართლომ საქმეში არსებული  და  სასამართლო სხდომაზე გამოკვლეულ მტკიცებულებათა ერთობლიობით ბრალდებულები დამნაშავედ ცნო წარდგენილ ბრალდებაში და მათ სასჯელის სახედ და ზომად თითოეულს  2-2 წლით თავისუფლების აღკვეთა  განუსაზღვრა. 

განაჩენი შეიძლება გასაჩივრდეს გამოცხადებიდან ერთი თვის ვადაში, თბილისის სააპელაციო სასამართლოს სისხლის სამართლის საქმეთა პალატაში.