თურქეთის სასამართლო ხელისუფლების ვიზიტი საქალაქო სასამართლოში

2014 წლის 14 მაისს თბილისის საქალაქო სასამართლოს თურქეთის რესპუბლიკის სასამართლო ხელისუფლების  დელეგაცია ეწვია, რომელსაც თურქეთის უზენაესი სასამართლოს თავმჯდომარე ალი ალკანი ხელმძღვანელობს. დელეგაციის წევრებს თბილისის საქალაქო სასამართლოს თავმჯდომარემ მამუკა ახვლედიანმა უმასპინძლა. შეხვედრაზე მხარეებმა სასამართლოში საქმისწარმოების ელექტრონულ პროგრამასთან დაკავშირებით,   სასამართლო სისტემაში მიმდინარე რეფორმებსა და სამომავლო გეგმებზე ისაუბრეს. 

მამუკა ახვლედიანმა დელეგაციის წევრებს სასამართლოს შენობა, ნაფიც მსაჯულთათავის განკუთვნილის სასამართლო  სხდომის დარბაზი,   მოქალაქეთა მომსახურების ცენტრი დაათვალიერებინა და მისი  ფუნქციონირების შესახებ ინფორმაცია  მიაწოდა. სტუმრები, ასევე, დაესწრნენ სისხლის სამართლის საქმის წინასასამართლო განხილვის სხდომას, რომელზეც მხარეთა შეთანხმების საფუძველზე სასამართლომ საპროცესო შეთანხმება დაამტკიცა. 

საქართველოს უზენაესი სასამართლოს მოწვევით,  თურქეთის რესპუბლიკის სასამართლო ხელისუფლების  დელეგაცია თბილისს 12 მაისს ეწვია. ვიზიტის მიზანია საქართველოსა და თურქეთის სასამართლოებს შორის ურთიერთობების გაღრმავება და საქართველოს სასამართლო სისტემის რეფორმასთან დაკავშირებული ინოვაციური პროექტების შესახებ ინფორმაციის მიწოდება.

ვიზიტის ფარგლებში, დელეგაციის წევრები ეცნობიან ქართული სასამართლო სისტემის მოდელსა და მისი მოწყობის ძირითად პრინციპებს, ქართული სასამართლო რეფორმის მიღწევებს. დელეგაციის წევრებმა საქმიანი შეხვედრები უკვე გამართეს უზენაესი სასამართლოს თავმჯდომარე კონსტანტინე კუბლაშვილთან, იუსტიციის უმაღლესი საბჭოს მდივან ლევან მურუსიძესთან.  

თურქეთის დელეგაციის  სამუშაო ვიზიტი საქართველოში ხვალ დასრულდება.