სასამართლომ გამამართლებელი განაჩენი დაადგინა

2014 წლის 12 ივნისს, თბილისის საქალაქო სასამართლომ კიდევ ერთი გამამართლებელი განაჩენი დაადგინა. პოლიციის მუშაკის  მიმართ  საზოგადოებრივი წესრიგის დაცვისათვის ხელის შეშლის ფაქტზე ბრალდებული გენრიხ აროშიძე სასამართლომ უდანაშაულოდ სცნო და მის მიმართ გამამართლებელი განაჩენი დაადგინა. გ. აროშიძეს გირაოს სახით გადახდილი თანხა 3000 ლარის ოდენობით უკან დაუბრუნდება, განაჩენის აღსრულებიდან 1 (ერთი) თვის ვადაში.

საქმის მასალების თანახმად, 2013 წლის 25 აგვისტოს, შსს ძველი თბილისის სამმართველოს პირველი განყოფილების თანამშრომლებმა, სამსახურეობრივი მოვალეობის შესრულებისას დაადგინეს გენრიხ აროშიძის პირადი ჩხრეკის გადაუდებელი აუცილებლობა, რასაც ეს უკანასკნელი არ დათანხმდა და სამართალდამცავი ორგანოების წარმომადგენლებს  სიტყვიერი და ფიზიკური შეურაცხყოფა მიაყენა. 

საქმის არსებითად განხილვისას ბრალდებულმა თავი არ სცნო დამნაშავედ წარდგენილ ბრალდებაში.

განაჩენის დადგენისას სასამართლოს მიერ მხედველობაში მიღებულ იქნა მოწმეთა ჩვენებები, ასევე სასამართლო განხილვისას გამოკვლეული სხვა მტკიცებულებები, რაც არ აღმოჩნდა საკმარისი წარდგენილი ბრალდებით პირის დამნაშავედ ცნობისათვის. შესაბამისად, სასამართლომ გენრიხ აროშიძე უდანაშაულოდ სცნო და მის მიმართ გამამართლებელი განაჩენი დაადგინა.

აღნიშნულ საქმეზე ჩატარდა  15 სხდომა, რომლებზედაც განხორციელდა მტკიცებულებათა გამოკვლევა და მოწმის სახით დაიკითხა 18 პირი.

განაჩენი შეიძლება გასაჩივრდეს გამოცხადებიდან ერთი თვის ვადაში, თბილისის სააპელაციო სასამართლოს სისხლის სამართლის საქმეთა პალატაში.