ნაფიც მსაჯულთა მონაწილეობით საქმის განხილვა დაიწყო

2014 წლის 8 სექტემბერს,  თბილისის საქალაქო სასამართლოში დაიწყო ნაფიც მსაჯულთა განსჯადი მერვე სისხლის სამართლის საქმის არსებითი განხილვა, ანგარებით და ჯგუფურად ჩადენილი ანნა ბაბოევის განზრახ მკვლელობისა და წინასწარი შეთანხმებით ჯგუფის მიერ ჩადენილი ქურდობის ფაქტზე, ბრალდებულ სერგეი ბაბოიანის მიმართ.

ღია სასამართლო სხდომაზე, მოსამართლემ დაცვის  და ბრალდების მხარეებს და ნაფიც მსაჯულებს მათი უფლება-მოვალეობები განუმარტა. მსაჯულებს მიეცათ განმარტება გამოსაყენებლი კანონის თაობაზე, ასევე განემარტათ, რომ საქმეზე საბოლოო ვერდიქტის გამოტანამდე მათ ეკრძალებათ საქმის განხილვისას მიღებული ინფორმაციის გამჟღავნება, საკუთარი აზრის დაფიქსირება და სასამართლო პროცესს მიღმა საქმესთან დაკავშირებით ინფორმაციის მოძიება. დღესვე, წილისყრის საფუძველზე შეირჩა უფროსი მსაჯული და ნაფიცმა მსაჯულებმა დადეს ფიცი, რომ პატიოსნად და მიუკერძოებლად აღასრულებენ ნაფიცი მსაჯულის მოვალეობას. ნაფიც მსაჯულთა შემადგენლობა კონფიდენციალურია. მათი უსაფრთხოების მიზნით, სასამართლო სხდომაზე დამსწრე პირებს და პროცესის მონაწილეებს ეკრძალებათ მსაჯულთა ვინაობის გამხელა.

დღევანდელ სხდომაზე, ბრალდებისა და დაცვის მხარეთა მიერ შესავალი სიტყვების წარმოდგენის შემდეგ, დაიწყო მტკიცებულებათა გამოკვლევა და დაიკითხა ბრალდების ერთი მოწმე. 

აღნიშნულ საქმეზე მომდევნო სხდომა 2014 წლის   9 სექტემბერს,  11 საათზე გაიმართება.