ნაფიცი მსაჯულების მონაწილეობით საქმის არსებითად განხილვა იწყება

დღეს, 2015 წლის 9 იანვარს,   თბილისის საქალაქო სასამართლოში დასრულდა ნაფიც მსაჯულთა შერჩევის სხდომა ზურაბ გორგაძის ბრალდების სისხლის სამართლის საქმეზე.

ზურაბ გორგაძეს ბრალად ედება ორი პირის განზრახ მკვლელობა, ისეთი საშუალებით, რომელიც განზრახ უქმნის საფრთხეს სხვათა სიცოცხლეს და ჯანმრთელობას; აგრეთვე ცეცხლსასროლი იარაღის და საბრძოლო მასალის მართლსაწინააღმდეგო შეძენა, შენახვა, ტარება და ცეცხლსასროლი იარაღის და საბრძოლო მასალის მართლსაწინააღმდეგო ტარება.

ნაფიც მსაჯულთა შერჩევის სხდომებზე გამოცხადებულ კანდიდატთაგან, მხარეთა მოსაზრებების გათვალისწინებით შეირჩა 12 ძირითადი და 2 სათადარიგო ნაფიცი მსაჯული,რომლებიც უშუალოდ ჩაერთვებიან საქმის არსებით განხილვაში და მიიღებენ გამამართლებელ ან გამამტყუნებელ ვერდიქტს. 

ნაფიც  მსაჯულთა შემადგენლობა კონფიდენციალურია. მათი უსაფრთხოების მიზნით, სასამართლო სხდომაზე დამსწრე პირებს და პროცესის მონაწილეებს ეკრძალებათ მსაჯულთა ვინაობის გამხელა. სხდომის ფოტოგადაღება, კინო, ვიდეო, აუდიოჩაწერა და ეთერში გადაცემა უნდა განხორციელდეს  ნაფიც მსაჯულთა გადაღების, მათი ვინაობის, გარეგნული ნიშნების და სხვა პერსონალური მონაცემების გამხელის გარეშე.

ნაფიც მსაჯულთა სასამართლო შემადგენლობით  სისხლის სამართლის საქმის არსებითი განხილვა 2015 წლის 12 იანვარს, 10:30 საათზე დაიწყება.