სასამართლომ ძალადობრივი დანაშაულის ჩადენაში ბრალდებული პირი ნაწილობრივ გაამართლა

რუსთავის საქალაქო სასამართლოს მიერ განხილულ იქნა  ბრალდებულ ფ.ე.-ს  მიმართ სისხლის სამართლის საქმე დანაშაულის ჩადენისათვის, რაც გათვალისწინებულია საქართველოს  სისხლის სამართლის კოდექსის 126¹-ე მუხლის პირველი ნაწილით (ოჯახის ერთი წევრის მიერ ოჯახის სხვა წევრის მიმართ ძალადობა, რამაც გამოიწვია ფიზიკური ტკივილი ან ტანჯვა და რასაც არ მოჰყოლია ამ კოდექსის 117-ე, 118-ე ან 120-ე  მუხლით გათვალისწინებული შედეგი) და საქართველოს  სისხლის სამართლის კოდექსის 117-ე მუხლის პირველი ნაწილით (ჯანმრთელობის განზრახ მძიმე დაზიანება, ესე იგი სხეულის დაზიანება, რომელიც სახიფათოა სიცოცხლისათვის).

სასამართლომ  ბრალდებული  ფ.ე.  ოჯახური ძალადობის ეპიზოდში საქართველოს  სისხლის სამართლის კოდექსის 126¹-ე მუხლის პირველი ნაწილით გათვალისწინებული ქმედების ჩადენაში უდანაშაულოდ ცნო და გაამართლა, ვინაიდან სასამართლოს მოსაზრებით ბრალდების მხარის მიერ ვერ იქნა წარმოდგენილი, საკმარის მტკიცებულებათა ერთობლიობა, რომელიც გონივრულ ეჭვს მიღმა სტანდარტით დაადასტურებდა ბრალდებულის ფ.ე.-ს  მიერ ბრალად შერაცხული ქმედების ჩადენას. 

ხოლო  საქართველოს  სისხლის სამართლის კოდექსის 117-ე მუხლის პირველი ნაწილით (ჯანმრთელობის განზრახ მძიმე დაზიანების ეპიზოდი) ბრალდებაში ფ.ე.-ს მიმართ წარდგენილი ბრალდება დააკვალიფიცირა საქართველოს სისხლის სამართლის კოდექსის  122-ე მუხლით (ჯანმრთელობის  მძიმე დაზიანება აუცილებელი მოგერიების ფარგლების გადაცილებით), ვინაიდან სასამართლოს მოსაზრებით საქმეში არსებული მტკიცებულებების ობიექტური და მიუკერძოებელი შეფასება საფუძველს არ იძლეოდა დასკვნისთვის, რომ ფ.ე.-მ ჩაიდინა  ჯანმრთელობის განზრახ მძიმე დაზიანება და ბრალდებულის ქმედება დააკვალიფიცირა უფრო მსუბუქი დანაშაულის ნიშნებით კერძოდ, საქართველოს სისხლის სამართლის კოდექსის 122-ე მუხლით და სასჯელის სახედ და ზომად განუსაზღვრა თავისუფლების აღკვეთა  - 10 (ათი) თვის ვადით.

სასამართლოს  განაჩენი შეიძლება გასაჩივრდეს გამოცხადებიდან ერთი თვის ვადაში, თბილისის სააპელაციო სასამართლოს სისხლის სამართლის საქმეთა პალატაში.