თბილისის საქალაქო სასამართლოს, საქართველოს განათლებისა და მეცნიერების სამინისტროს სსიპ საგანმანათლებლო დაწესებულების მანდატურის სამსახურის პროგრამის ”პროფესიული ორიენტაცია და კარიერის დაგეგმვა” ფარგლებში, N63 საჯარო სკოლის მე-9 კლასის მოსწავლეები სტუმრობდნენ. მოსწავლეებს თბილსის საქალაქო სასამართლოს მენეჯერი მაკა თოდუა და მოქალაქეთა მომსახურების ცენტრის უფროსი სალომე ტყეშელაშვილი შეხვდნენ. სტუმრებმა სასამართლოს შენობა და სასამართლო სხდომის დარბაზები დაათვალიერეს, გაეცნენ ელექტრონული საქმის წარმოების პროცესს, ასევე მიიღეს ინფორმაცია სასამართლო მედიაციის პროექტის შესახებ და მედიაციის სესიებისათვის განკუთვნილი ოთახებიც დაათვალიერეს.
მოსწავლეებთან შეხვედრა კითხვა-პასუხის რეჟიმში გაგრძელდა. სასამართლო პროცესის მიმდინარეობა, არასრულწლოვანთა პასუხისმგებლობა, საინტერესო სამართლებრივი პრეცედენტები- ეს ის საკითხებია, რომლითაც სტუმრები დაინტერესდნენ. შეხვედრის დასასრულს მოსწავლეებს წიგნი ”სამართლის ქალაქი” გადაეცათ. |