საქართველოს სასამართლო მედიატორთა ასოციაციის პრეზენტაცია

დღეს, მართლმსაჯულების სახლში, თბილისის საქალაქო სასამართლოს მედიაციის საპილოტე პროექტის შუალედური ანგარიშის, სამომავლო გეგმებისა და საქართველოს სასამართლო მედიატორთა ასოციაციის პრეზენტაცია შედგა.

ღონისძიებას მოსამართლეთა კორპუსის, ადვოკატთა ასოციაციის, არასამთავრობო და საერთაშორისო ორგანიზაციების წარმომადგენლები დაესწრნენ. 

პრეზენტატორებმა თავიანთ გამოსვლებში ყურადღება გაამახვილეს მედიაციის პროექტის მიმდინარეობაზე, პრაქტიკაში გამოკვეთილ პრობლემურ საკითხებსა და მათი მოგვარების გზებზე. საუბარი შეეხო, ასევე, პროექტის მნიშვნელობას სასამართლოს პროცესუალური დავებისგან განტვირთვის თვალსაზრისით, სასამართლო მედიაციის სამომავლო განვითარებისა და ცნობადობის ამაღლების საკითხებს. დღესვე, გამოითქვა მზაობა, სავალდებულო მედიაციის ამოქმედების თაობაზე, რაც გულისხმობს განსაზღვრული კატეგორიის დავების მედიაციისთვის გადაცემის ვალდებულებას.

საქართველოს სასამართლო მედიატორთა ასოციაციამ თანამშრომლობის მემორანდუმი გააფორმა თბილისის საქალაქო სასამართლოს, საქართველოს ადვოკატთა ასოციაციასა და დავის ალტერნატიული გადაწყვეტის ნაციონალურ ცენტრთან. მემორანდუმების ფარგლებში, ორგანიზაციები მჭიდროდ ითანამშრომლებენ მედიაციის საპილოტე პროექტის შემდგომი განვითარებისა და პოპულარიზაციისთვის. ერთობლივად დაიგეგმება სემინარები, ტრენინგები და სხვა ფორმატის სამუშაო შეხვედრები. 

თბილისის საქალაქო სასამართლოში მედიაციის პროექტი 2014 წლიდან საპილოტე რეჟიმში ფუნქციონირებს და წარმოადგენს სამართლებრივი დავის გადაჭრის ალტერნატიულ გზას.