|
დღეს, მართლმსაჯულების სახლში არაკომერციული იურიდიული პირი - პროფესიული გაერთიანება ” საქართველოს იურისტთა ეროვნული ასოციაციის” ეგიდით, კონფერენცია გაიმართა.
კონფერენციის ძირითადი თემები საერთო სასამართლოებში საქმეთა ნაკადის პროგრამული მართვა, საქმეთა სირთულის ხარისხის მიხედვით განაწილება, მოსამართლეთა საკმარისი რაოდენობის დადგენა და მოსამართლეთა საქმიანობის (დატვირთულობის) შეფასების სისტემა იყო.
საქართველოს იურისტთა ეროვნული ასოციაციის პრეზიდენტმა და თბილისის საქალაქო სასამართლოს თავმჯდომარემ მამუკა ახვლედიანმა ელექტრონული საქმისწარმოების პროგრამაში საქმეთა განაწილების სისტემის ახალი მოდული არასამთავრობო და საერთაშორისო ორგანიზაციების, სამეცნიერო წრეების, ადვოკატთა და მოსამართლეთა კორპუსის წარმომადგენლებს თავად წარუდგინა. ღონისძიებას საქართველოს უზენაესი სასამართლოს თავმჯდომარე ნინო გვენეტაძე ესწრებოდა.
შეხვედრა დისკუსიის ფორმატში წარიმართა. სტუმრებს საშუალება ჰქონდათ დაესვათ კითხვები, კონფერენციის ძირითადი თემების ირგვლივ გამოეთქვათ თავიანთი მოსაზრებები და ემსჯელათ პროექტის ეფექტურობაზე. |
მომწონს (
არ მომწონს (
