თბილისის საქალაქო სასამართლომ პროკურატურის შუამდგომლობა დააკმაყოფილა

2015 წლის 17 ივნისს, თბილისის საქალაქო სასამართლოს სისხლის სამართლის საქმეთა კოლეგიამ დააკმაყოფილა პროკურატურის შუამდგომლობა ბრალდებულების - აიუფ ბორჩაშვილის, გიორგი ხუტუნიშვილის, გიორგი კუპრავას და დავით ფირისებიას მიმართ აღკვეთის ღონისძიების სახით პატიმრობის გამოყენების თაობაზე. 

წარდგენილი ბრალის თანახმად, ბრალდებულ გიორგი ხუტუნიშვილს, გიორგი კუპრავას, დავით ფირისებიას და აიუფ ბორჩაშვილს ბრალად ედებათ მასში,  რომ ჩაიდინეს უცხო ქვეყნის ტერორისტულ ორგანიზაციაში გაერთიანება და ტერორისტულ საქმიანობაში მისი დახმარება, ა.ბორჩაშვილს, ასევე ბრალად ედება ტერორისტულ ორგანიზაციაში გაწევრიანებისათვის პირების გადაბირება.

სასამართლომ განიხილა შუამდგომლობა, მოისმინა მხარეთა განმარტებები, გაეცნო წარმოდგენილ მასალებს და მიიჩნია, რომ სახეზეა აღკვეთის ღონისძიების გამოყენების როგორც ფორმალური, ასევე ფაქტობრივი საფუძვლები. აღკვეთის ღონისძიების კონკრეტული სახის შერჩევისას სასამართლომ მხედველობაში მიიღო ის გარემოება, რომ ბრალდებულებს ბრალად ედებათ განსაკუთრებით მძიმე კატეგორიის და ა. ბორჩაშვილს ასევე მძიმე კატეგორიის დანაშაულის ჩადენა. ამასთან, სასამართლომ მიიჩნია, რომ არსებობს მოცემულ სისხლის სამართლის საქმეზე  დაკითხულ და დასაკითხ მოწმეებზე ზემოქმედების, მტკიცებულებათა მოპოვების ხელშეშლის, ახალი დანაშაულის ჩადენისა და მიმალვის საფრთხე. შესაბამისად,  სასამართლომ აღკვეთის ღონისძიების ყველაზე უფრო მკაცრი სახე გამოიყენა.

აღნიშნულ სისხლის სამართლის საქმეზე წინასასამართლო სხდომა 2015 წლის 5 აგვისტოს 11:00 საათზე გაიმართება.