დღეს, თბილსის საქალაქო სასამართლოს სისხლის სამართლის საქმეთა კოლეგიამ დაასრულა ნაფიცი მსაჯულების განსჯად მორიგ სისხლის სამართლის საქმეზე მსაჯულთა შერჩევის პროცესი, ბრალდებულ მამუკა ბრეგვაძის მიმართ. საქმის არსებითი განხილვა 2015 წლის 22 ივნისს, 13:00 საათზე დაიწყება.
წარდგენილი ბრალდების თანახმად, მამუკა ბრეგვაძეს ბრალად ედება ქონებრივი დაზიანება მოტყუებით, ე.ი ქონების მესაკუთრის ან მფლობელის ქონებრივი დაზიანება მოტყუებით, თუ არ არის საქართველოს სსკ-ის 180-ე მუხლით (თაღლითობა) გათვალისწინებული დანაშაულის ნიშნები, ჩადენილი წინასწარი შეთანხმებით ჯგუფის მიერ, დიდი ოდენობით.
აღნიშნულ საქმეზე, მამუკა ბრეგვაძესთან ერთად ბრალდებული პირების - მალხაზ ჯოხაძის, ზაზა ჩხიკვიშვილის და ზვიად ბრეგვაძის მიმართ სისხლის სამართლის საქმეები გამოყოფილ იქნა ცალკე წარმოებად და დაუბრუნდა პროკურორს განრიდების განხორციელების მიზნით.
ნაფიც მსაჯულთა შესარჩევად ჩატარდა 9 სხდომა, ხოლო დღევანდელ სხდომაზე განისაზღვრა შერჩეულ კანდიდატთაგან 12 ძირითადი და 2 სათადარიგო ნაფიცი მსაჯული, რომლებიც უშუალოდ ჩაერთვებიან საქმის არსებით განხილვაში.
ნაფიც მსაჯულთა შემადგენლობა კონფიდენციალურია. მათი უსაფრთხოების მიზნით, სასამართლო სხდომაზე დამსწრე პირებს და პროცესის მონაწილეებს ეკრძალებათ მსაჯულთა ვინაობის გამხელა. სხდომის ფოტოგადაღება, კინო, ვიდეო, აუდიოჩაწერა და ეთერში გადაცემა უნდა განხორციელდეს ნაფიც მსაჯულთა გადაღების, მათი ვინაობის, გარეგნული ნიშნების და სხვა პერსონალური მონაცემების გამხელის გარეშე. |