თბილისის საქალაქო სასამართლომ გამამართლებელი განაჩენი დაადგინა

თბილისის საქალაქო სასამართლოს სისხლის სამართლის საქმეთა კოლეგიამ ქურდობის მცდელობისათვის ბრალდებულ ნუგზარ ღ.-ს მიმართ გამამართლებელი განაჩენი დაადგინა. ბრალდებულის მიმართ აღკვეთის ღონისძიების სახით გამოყენებული გირაო გაუქმდა და გირაოს შემტან პირს  სრულად დაუბრუნდება. 

წარდგენილი ბრალის თანახმად, 2014 წლის 14 მარტს, ქ.თბილისში, ნუცუბიძის ქუჩის მიმდებარედ, ნუგზარ ღ. შეეცადა ანა.მ-ს ხელჩანთიდან, მართლსაწინააღმდეგო მისაკუთრების მიზნით, ფარულად დაუფლებოდა ამ უკანასკნელის კუთვნილ საფულეს, მასში მოთავსებული ნივთებით. დაზარალებულმა იგი ქმედების განხორციელებისას შენიშნა, რის გამოც მან  განზრახული სისრულეში ვერ მოიყვანა. შესაბამისად, მას წარედგინა ბრალი ქურდობის მცდელობის კვალიფიკაციით. (სსსკ-ის 19, 177-1) 

ღია სასამართლო სხდომაზე ბრალდებულმა თავი არ სცნო დამნაშავედ. აღნიშულ საქმეზე სულ 10 სასამართლო სხდომა გაიმართა და დაიკითხა 7 მოწმე. 

სასამართლომ მიიჩნია, რომ ნუგზარ ღ.-ს მიმართ ბრალდების მხარემ ვერ წარმოადგინა პირის დამნაშავედ ცნობისათვის საკმარის მტკიცებულებათა ერთობლიობა. კერძოდ, საქმეში წარმოდგენილი ირიბი ჩვენებები მტკიცებულებას აღარ წარმოადგენს, ხოლო ერთი პირდაპირი ჩვენება ვერ ქმნის პირის დამნაშავედ ცნობისათვის საკმარის საფუძველს.  სასამართლო სხდომებზე ნუგზარ ღ.-ს ბრალეულობა ვერ იქნა დადასტურებული შერაცხულ დანაშაულში და გონივრულ ეჭვს მიღმა არსებული სტანდარტით, სასამართლომ განაჩენი ბრალდებულის სასარგებლოდ გამოიტანა.  

 სასამართლოს განაჩენი შეიძლება გასაჩივრდეს სააპელაციო წესით, თბილისის სააპელაციო სასამართლოს სისხლის სამართლის საქმეთა პალატაში, განაჩენის გამოცხადებიდან ერთი თვის ვადაში, თბილისის საქალაქო სასამართლოს სისხლის სამართლის საქმეთა კოლეგიის მეშვეობით.