თბილისის საქალაქო სასამართლოს სისხლის სამართლის საქმეთა კოლეგიამ გამამტყუნებელი განაჩენი დაადგინა განსაკუთრებით დიდი ოდენობით ნარკოტიკული საშუალების უკანონო შეძენა, შენახვა და საქართველოში უკანონოდ შემოტანის ფაქტზე, ბრალდებულ მარინე ზ.-ს მიმართ. სასამართლომ მას 15 წლით თავისუფლების აღკვეთა მიუსაჯა.
წარდგენილი ბრალის თანახმად, მარინე ზ.-მ 2015 წლის იანვარში, თურქეთში უკანონოდ შეიძინა განსაკუთრებით დიდი ოდენობით 6,6515 გრამი ნარკოტიკული საშუალება ჰეროინის შემცველი ფხვნილი და გრანულები და განსაკუთრებით დიდი ოდენობით 2,3223 გრამი ნარკოტიკული საშუალება მეტამფეტამინის შემცველი კრისტალები, რასაც უკანონოდ ინახავდა პირადად და 2015 წლის 20 იანვარს სასაზღვრო გამშვებ პუნქტ ”თბილისის საერთაშორისო აეროპორტ”-ის გამოვლით უკანონოდ შემოიტანა საქართველოში. ( სსკ-ის 262-ე მუხლის მე-4 ნაწილის ”ა” ქ/პ და 260-ე მუხლის მე-3 ნაწილის ”ა” ქ/პ)
ღია სასამართლო სხდომებზე ბრალდებული თავს დამნაშავედ სცნობდა.
სასამართლომ გამოიკვლია მოწმეთა ჩვენებები, საქმეში არსებული მტკიცებულებები, მოისმინა მხარეთა პოზიციები და არგუმენტები და უტყუარ მტკიცებულებათა ერთობლიობით ბრალდებული მარინე ზ. დამნაშავედ სცნო. ბრალდებულს, დანაშაულთა ერთობლიობით, საბოლოო სასჯელის სახედ და ზომად 15 წლით თავისუფლების აღკვეთა მიესაჯა.
სასამართლოს განაჩენი შეიძლება გასაჩივრდეს სააპელაციო წესით თბილისის სააპელაციო სასამართლოს სისხლის სამართლის საქმეთა პალატაში განაჩენის გამოცხადებიდან ერთი თვის ვადაში, თბილისის საქალაქო სასამართლოს სისხლის სამართლის საქმეთა კოლეგიის მეშვეობით. |