სასამართლომ ბრალდებულ გიორგი ოქროპირიძის მიმართ გამოყენებული პატიმრობა არ გააუქმა

2015 წლის 18 სექტემბერს, თბილისის საქალაქო სასამართლოს სისხლის სამართლის საქმეთა კოლეგიამ არ დააკმაყოფილა ბრალდებულ გიორგი ოქროპირიძის ადვოკატების შუამდგომლობა, მის მიმართ გამოყენებული აღკვეთის ღონისძიების - პატიმრობის გაუქმების თაობაზე.  

საკონსტიტუციო სასამართლოს 2015 წლის 15 სექტემბრის გადაწყვეტილებით, ბრალდებულის მიმართ განმეორებითი პატიმრობის გამოყენება ყოველთვის არ არის არაკონსტიტუციური. კერძოდ, პატიმრობის განმეორებით გამოყენება შესაძლოა იმ დანაშაულისათვის, რომელიც პირმა პირველ საქმეზე პატიმრობის შეფარდების შემდეგ ჩაიდინა. თბილისის საქალაქო სასამართლომ გაიზიარა საკონსტიტუციო სასამართლოს აღნიშნული მსჯელობა და ჩათვალა, რომ პატიმრობა გიორგი ოქროპირიძის მიმართ, განმეორებით  გამოყენებულ იქნა მაშინ, როდესაც მან შესაძლო ახალი დანაშაული პირველი აღკვეთის ღონისძიების შეფარდების შემდეგ ჩაიდინა (ნაფიც მსაჯულთა განსჯადი ლ. მახარაძის განზრახ მკვლელობის ბრალდების საქმე).  მოცემულ შემთხვევაში არ არსებობდა განმეორებით გამოყენებული აღკვეთის ღონისძიების- პატიმრობის გაუქმების საფუძველი და შესაბამისად, ბრალდებული გ. ოქროპირიძე ცრუ დასმენისა და ცრუ ჩვენების მიცემის ბრალდების სისხლის სამართლის საქმეზე რჩება პატიმრობაში. 

აღნიშნულ საქმეზე მომდევნო სხდომა გაიმართება 2015 წლის 24 სექტემბერს, 16:00 საათზე თბილისის საქალაქო სასამართლოში.