თბილისის საქალაქო სასამართლომ გამამართლებელი განაჩენი დაადგინა

2015 წლის 16 ოქტომბერს, თბილისის საქალაქო სასამართლოს სისხლის სამართლის საქმეთა კოლეგიამ,  გამამართლებელი განაჩენი დაადგინა ბრალდებულების ზაზა კაპანაძის, გია ნაცვლიშვილის, გიორგი საბანაძისა და სერგო ქავთარაძის მიმართ. 

წარდგენილი ბრალის თანახმად, გია ნაცვლიშვილსა და ზაზა კაპანაძეს ბრალად ედებოდათ თაღლითობა, წინასწარი შეთანხმებით ჯგუფის მიერ, მართლსაწინააღმდეგო მისაკუთრების მიზნით, დიდი ოდენობით სხვისი ნივთის დაუფლება მოტყუებით. ასევე, ბრალად ედებოდათ უკანონო შემოსავლის ლეგალიზაცია. ხოლო, გიორგი საბანაძესა და სერგო ქავთარაძეს ბრალად ედებოდათ დახმარება თაღლითობაში, ესე იგი დახმარება მართლსაწინააღმდეგო მისაკუთრების მიზნით სხვისი ნივთის მოტყუებით დაუფლებაში, ჩადენილი წინასწარი შეთანხმებით ჯგუფის მიერ, დიდი ოდენობით. 

საქმე ეხება, 2009 -2012 წლებში, დედაქალაქში აღმაშნებელისა და მარჯანიშვილის გამზირებზე, კალაუბნისა და ზაარბრიუკენის მოედნებზე მიმდინარე სარეაბილიტაციო სამუშაოებს, რომლის დროსაც, ა (ა)იპ „ძველი ქალაქის რეაბილიტაციისა და განვითარების ფონდის“ და „თბილისის განვითარების ფონდიდან“ დანაშაულებრივი გეგმით, ბრალდებულები დაეუფლნენ  დიდი ოდენობით ფულად თანხას 4 052 108 ლარის ოდენობით.  საქმის მასალების თანახმად, ბრალდებულებმა შესაბამის დოკუმენტაციაში სამუშაოთა რეალურ ღირებულებასთან შედარებით გაზრდილი ფასები დააფიქსირეს. 

აღნიშნულ სისხლის სამართლის საქმეზე ჩატარდა 25 სხდომა. დაიკითხა ბრალდების 16 მოწმე, გამოქვეყნდა ერთი მოწმის ჩვენება, ასევე დაიკითხა ორი ბრალდებული და დაცვის  3  მოწმე. 

სასამართლომ, მხარეთა ახსნა - განმარტებების, საქმეში წარმოდგენილი მტკიცებულებების გამოკვლევის და მოწმეთა ჩვენებების მოსმენის შემდეგ, მიიჩნია, რომ ბრალდებულთა მიმართ ბრალდების მხარემ ვერ წარმოადგინა გონივრულ ეჭვს მიღმა არსებულ შეთანხმებულ მტკიცებულებათა ერთობლიობა პირთა დამნაშავედ ცნობისათვის. შესაბამისად, მათი ბრალეულობა ვერ იქნა დადასტურებული შერაცხულ დანაშაულში და სასამართლომ განაჩენი ბრალდებულთა სასარგებლოდ გამოიტანა.

სასამართლოს განაჩენი შეიძლება გასაჩივრდეს სააპელაციო წესით, თბილისის სააპელაციო სასამართლოს სისხლის სამართლის საქმეთა პალატაში, განაჩენის გამოცხადებიდან ერთი თვის ვადაში, თბილისის საქალაქო სასამართლოს სისხლის სამართლის საქმეთა კოლეგიის მეშვეობით.