2015 წლის 19 ოქტომბერს, თბილისის საქალაქო სასამართლოს ბრემენის საქალაქო სასამართლოს თავმჯდომარე კლაუს შლუტერი და ამავე სასამართლოს თავმჯდომარის მოადგილე ელენ ბესტი ეწვივნენ. სტუმრებს თბილისის საქალაქო სასამართლოს თავმჯდომარემ მამუკა ახვლედიანმა და სასამართლოს მენეჯერმა მაკა თოდუამ უმასპინძლეს.
მამუკა ახვლედიანმა უცხოელ კოლეგებს საქმისწარმოების ელექტრონული პროგრამის შესახებ მიაწოდა ინფორმაცია და მის მნიშვნელობაზე ისაუბრა. შეხვედრაზე ყურადღება გამახვილდა სასამართლოში საქმის განაწილების ახალ მოდულზე, რომელიც საქმის სირთულის მიხედვით განაწილებას გულისხმობს. მხარეებმა, ასევე, იმსჯელეს მენტორი მოსამართლეების გადამზადების პროცესზე. სტუმრებმა მზადყოფნა გამოთქვეს ამ კუთხით თავიანთი გამოცდილების გაეზიარებინათ. თბილისის საქალაქო სასამართლო, თავის მხრივ, დაინტერესდა ბრემენის საქალაქო სასამართლოს ორგანიზაციული მოწყობითა და მენეჯმენტის საკითხებით. შეხვედრაზე წამოჭრილი პრობლემური საკითხების მოგვარების გზებზე, სამომავლოდ, მხარეები ურთიერთთანამშრომლობას გეგმავენ.
მამუკა ახვლედიანმა დელეგაციის წევრებს სასამართლოს შენობა დაათვალიერებინა. სტუმრებმა სასამართლო სხდომის დარბაზები, მედიაციის სასესიო ოთახები, აპარატის თანამშრომელთა და მოსამართლეთა სამუშაო ოთახები მოინახულეს. ასევე, გაეცნენ მოქალაქეთა მომსახურების ცენტრის მუშაობას.
ბრემენის მოსამართლეთა დელეგაციის ვიზიტი საქართველოში გერმანიის საერთაშორისო თანამშრომლობის საზოგადოების (GIZ) ორგანიზებითა და მხარდაჭერით ხორცილდება. |