სასამართლომ თამარ ჩერგოლეიშვილს სიტყვიერი შენიშვნა გამოუცხადა

თბილისის საქალაქო სასამართლოს ადმინისტრაციულ საქმეთა კოლეგიამ დაასრულა სამართალდარღვევის ოქმის განხილვა თამარ ჩერგოლეიშვილის მიმართ და იგი სამართალდამრღვევად სცნო, თუმცა სასამართლოს დადგენილებით, იგი გათავისუფლდა ადმინისტრაციული პასუხისმგებლობისგან და გამოეცხადა სიტყვიერი შენიშვნა. 

ქ. თბილისის საპატრულო პოლიციის მთავარი სამმართველოს მიერ წარმოდგენილი ადმინისტრაციული სამართალდარღვევის ოქმის თანახმად, 2015 წლის 16 ოქტომბერს, რუსთაველის გამზ. N25 მიმდებარედ, ადმინისტრაციული წესით დააკავეს თამარ ჩერგოლეიშვილი, თვითმმართველი ერთეულის იერსახის დამახინჯებისათვის. კერძოდ, მან გარე განათების ბოძზე განათავსა სხვადასხვა სახის პლაკატები, ხსენებული ადგილი კი არ იყო საამისოდ გამოყოფილი. ჩადენილი ქმედებით დაირღვა ადმინისტრაციულ სამართალდარღვევათა კოდექსით გათვალისწინებული ის მუხლი, რომელიც თვითმმართველი ერთეულის იერსახის დამახინჯებას გულისხმობს.(ასკ-ის 150-ე მუხ. I ნაწ). 

სასამართლო გაეცნო წარმოდგენილ სამართალდარღვევათა ოქმს, მოისმინა მხარეთა ახსნა-განმარტებები, შეისწავლა წარმოდგენილი მტკიცებულებები და თამარ ჩერგოლეიშვილი სამართალდამრღვევად სცნო, თუმცა ჩადენილი ქმედების მცირე მნიშვნელობიდან გამომდინარე, იგი გათავისუფლდა ადმინისტრაციული პასუხისმგებლობისგან და გამოეცხადა სიტყვიერი შენიშვნა.

დადგენილება">დადგენილება შეიძლება გასაჩივრდეს დადგენილების გამოტანიდან 10 დღის ვადაში თბილისის სააპელაციო სასამართლოს ადმინისტრაციულ საქმეთა პალატაში.