ნაფიც მსაჯულთა განსჯად საქმეზე სასჯელის დანიშვნის სხდომა გაიმართა

2015 წლის 9 დეკემბერს, ნაფიც მსაჯულთა განსჯად, განზრახ მკვლელობის მცდელობის,  სისხლის სამართლის საქმეზე ბრალდებულ კ.მ.- ს მიმართ, სასჯელის დანიშვნის სხდომა გაიმართა. ნაფიც მსაჯულთა გამამტყუნებელი ვერდიქტის საფუძველზე,  სასამართლომ განაჩენი დაადგინა და მას სასჯელის სახედ და ზომად თავისუფლების  14 წლით აღკვეთა განუსაზღვრა, ხოლო, როგორც არასრულწლოვანს, სსკ-ის 88-ე მუხლის გათვალისწინებით,  აღნიშნული სასჯელი ¼-ით შეუმცირდა. ამასთან, დანიშნულმა სასჯელმა შთანთქა თბილისის საქალაქო სასამართლოს სისხლის სამართლის საქმეთა კოლეგიის მიერ 2014 წლის 3 ივლისის  განაჩენით   დანიშნული სასჯელი და საბოლოოდ, კ.მ.-ს 10 წლითა 6 თვის ვადით თავისუფლების აღკვეთა განესაზღვრა.

ბრალდების მხარის პოზიციის გათვალისწინებით, ნაფიც მსაჯულებს მონაწილეობა არ მიუღიათ სასჯელის დანიშვნის სხდომაში.

შეგახსენებთ, რომ 2015 წლის 7 დეკემბერს, ნაფიცმა მსაჯულებმა აღნიშნულ სისხლის სამართლის საქმეზე გამამტყუნებელი ვერდიქტი 8 ხმით  4-ის წინააღმდეგ მიიღეს. 

საქმის მასალების თანახმად, კ.მ-ს ბრალად ედებოდა წინასწარი შეცნობით სრულწლოვანი">არასრულწლოვანი პირის განზრახ მკვლელობის მცდელობა. საქმე ეხება 2015 წლის 28 აპრილს, ქ. თბილისში, არასრულწლოვანთა შორის მომხდარ ურთიერთშელაპარაკებას, რა დროსაც ბრალდებულმა დანის გამოყენებით დაზარალებულს გულმკერდის არეში მიაყენა სიცოცხლისთვის სახიფათო მძიმე ხარისხის დაზიანება. დროული სამედიცინო დახმარების აღმოჩენის შემდგომ, დაზარალებულისთვის ექიმებმა სიცოცხლის შენარჩუნება შეძლეს.

გამამტყუნებელი განაჩენი შესაძლებელია ერთჯერადად, საკასაციო წესით, გასაჩივრდეს თბილისის სააპელაციო სასამართლოში, მხოლოდ სისხლის სამართლის საპროცესო კოდექსით დადგენილი საფუძვლების არსებობისას.