2016 წლის პირველ სამუშაო დღეს, თბილისის საქალაქო სასამართლოს თავმჯდომარემ ჟურნალისტებს უმასპინძლა. მამუკა ახვლედიანმა თბილისის საქალაქო სასამართლოში მოსამართლეთა არასაკმარისი რაოდენობის გამო არსებულ პრობლემებზე კიდევ ერთხელ ღიად ისაუბრა და ვითარებას ხელოვნურად შექმნილი კრიზისი უწოდა. სასამართლოს თავმჯდომარემ მოსამართლეთა შერჩევისა და დანიშვნის კრიტერიუმები ეჭვქვეშ დააყენა და მისი მოსაზრებით იუსტიციის უმაღლესმა საბჭომ საკითხი ღია კენჭისყრით უნდა გადაწყვიტოს. მამუკა ახვლედიანმა უკმაყოფილება გამოთქვა იუსტიციის უმაღლესი სკოლადამთავრებული მოსამართლეობის კანდიდატთა არდანიშვნის გამო, რომელთა განათლებაზე სახელმწიფოს მხრიდან ფინანსური რესურსი დაიხარჯა, ასევე მისთვის მიუღებელია იმ მოსამართლეთა არ დანიშვნა, რომლებსაც უფლებამოსილების ვადა ამოეწურათ და წლების მანძილზე სისტემას ღირსეულად ემსახურნენ.
საქალაქო სასამართლოს თავმჯდომარე სრულად გაემიჯნა პოლიტიკურ პროცესებს და აღნიშნა, რომ არამართებულია უზენაესი სასამართლოს თავმჯდომარის ქ-ნ ნინო გვენეტაძის მისამართით იუსტიციის მინისტრის ქ-ნ თეა წულუკიანის მითითებები შიდაუწყებრივი საკითხების მოგვარებასთან დაკავშირებით.
|