2016 წლის 23 თებერვალს, თბილისის საქალაქო სასამართლოს შენობის ის ნაწილი გაიხსნა, სადაც ამოქმედებული ახალი ცვლილებების თანახმად გამოძიების ეტაპზე მოწმეთა დაკითხვა მოსამართლის მეთვალყურეობით წარიმართება. საქალაქო სასამართლოს ახალი შენობა საქართველოს უზენაესი სასამართლოს თავმჯდომარე ნინო გვენეტაძემ, იუსტიციის უმაღლესი საბჭოს მდივანმა და წევრებმა, მოწვეულ სტუმრებს მოწმეთა დაკითხვისათვის განკუთვნილი სხდომათა დარბაზები დაათვალიერებინეს.
ახალ შენობაში გამოძიებისა და დაცვის მიერ შემოტანილი შუამდგომლობების დაკმაყოფილების საფუძველზე, მოწმის დაკითხვა მოსამართლის ზედამხედველობისა და მეთვალყურეობის ქვეშ წარიმართება. მხარე, რომელმაც იშუამდგომლა სასამართლოს წინაშე მოწმის დაკითხვაზე მოსამართლის მეთვალყურეობით დახურულ სხდომაზე, განახორციელებს მოწმის დაკითხვას. ახალი წესის შესაბამისად დაიკითხება მოწმეთა ის კატეგორია, რომელიც ნებაყოფლობითი საპროცესო მოქმედება- გამოკითხვაზე უარს განუცხადებენ, როგორც დაცვის , ისე ბრალდების მხარეს.
მოწმეთა დაკითხვისათვის განკუთვნილ შენობაში, სადაც ამ ეტაპზე 9 სხდომის დარბაზი ფუნქციონირებს, საწყის ეტაპზე მოწმეთა დაკითხვას უხელმძღვანელებს თბილისის საქალაქო სასამართლოს სისხლის სამართლის საგამოძიებო კოლეგიის 16 მოსამართლე.
განხორციელებული საკანონმდებლო ცვლილებები თავისი შინაარსით მნიშვნელოვნად შეუწყობს ხელს მართლმსაჯულების მიმართ მოქალაქეთა ნდობის ამაღლებას. |