სასამართლომ განზრახ მკვლელობის მცდელობაში ბრალდებული დამნაშავედ სცნო

თბილისის საქალაქო სასამართლომ გამამტყუნებელი განაჩენი დაადგინა განზრახ მკვლელობის მცდელობაში ბრალდებულ, წარსულში ნასამართლევ  ვაჟა ნ.-ს მიმართ. მას საბოლოოდ, სასჯელის სახედ და ზომად თავისუფლების აღკვეთა 10 წლის ვადით განესაზღვრა. 

საქმის მასალების თანახმად,  2015 წლის 18 ივნისს, დაახლოებით 20:00 საათზე, ქ. თბილისში,  დიდი დიღმის ტერიტორიაზე მანუჩარ მ.-ს მისი მეუღლის შეურაცხყოფის გამო, შელაპარაკება მოუვიდა ვაჟა ნ.-სთან, რაც გადაიზარდა ჩხუბში. ჩხუბის დასრულების შემდეგ, ვაჟა ნ.-მ შურისძიების მოტივით, განზრახ მკვლელობის მიზნით მანუჩარ მ.-ს ზურგში დაარტყა დანა, რის შედეგადაც ეს უკანასკნელი წაიქცა. განზრახვის სისრულეში მოსაყვანად, ვაჟა ნ. კვლავ შეეცადა დანის განმეორებით დარტყმას, თუმცა მისგან დამოუკიდებელი მიზეზების გამო ვერ შეძლო განზრახვის სისრულეში მოყვანა.

აღნიშნულ სისხლის სამართლის საქმეზე ჩატარდა 35 სასამართლო სხდომა, დაიკითხა ბრალდების და დაცვის 30 მოწმე. ვაჟა  ნ.-მ წარდგენილ ბრალდებაში თავი დამნაშავედ არ სცნო. სასამართლო გაეცნო საქმეში წარმოდგენილ მასალებს, მოისმინა მხარეთა პოზიციები და მოწმეთა ჩვენებები და სასამართლო სხდომებზე გამოკვლეულ მტკიცებულებათა ერთობლიობით, ვაჟა ნ. დამნაშავედ სცნო მის მიმართ ბრალად შერაცხულ დანაშაულში. ვინაიდან, ვაჟა ნ. იმყოფებოდა პირობითი მსჯავრის ქვეშ საბოლოოდ, მას განაჩენთა ერთობლიობით ძირითადი სასჯელის სახედ და ზომად განესაზღვრა თავისუფლების აღკვეთა 10  წლის ვადით.

სასამართლოს გადაწყვეტილება">გადაწყვეტილება შეიძლება გასაჩივრდეს თბილისის სააპელაციო სასამართლოში განაჩენის გამოცხადებიდან ერთი თვის ვადაში, თბილისის საქალაქო სასამართლოს სისხლის სამართლის საქმეთა კოლეგიის მეშვეობით.