2013 წლის 9 ივნისს 11.00 საათზე სასტუმრო „რედისონ ბლუ ივერიაში“ საქართველოს მოსამართლეთა X კონფერენცია ჩატარდება.
კონფერენციას გახსნის და დამსწრე საზოგადოებას მისასალმებელი სიტყვით მიმართავს უზენაესი სასამართლოს თავმჯდომარე კონსტანტინე კუბლაშვილი.
კონფერენციის დღის წესრიგის თანახმად, მოსამართლეები აირჩევენ ხმის დამთვლელ კომისიას, სამი მოსამართლის შემადგენლობით, რის შემდეგაც მოსამართლეები დაამტკიცებენ პროექტს „მოსამართლეთა კონფერენციის რეგლამენტში ცვლილებებისა და დამატებების შესახებ“.
რეგლამენტის დამტკიცების შემდეგ გაიმართება საქართველოს იუსტიციის უმაღლესი სკოლის დამოუკიდებელი საბჭოს თავმჯდომარის არჩევნები.
თავმჯდომარის არჩევის შემდეგ მოსამართლეები დაასახელებენ იუსტიციის უმაღლესი საბჭოს წევრობის კანდიდატებს.
იუსტიციის უმაღლესი საბჭოს წევრების არჩევა მოხდება ფარული კენჭისყრით. საჭიროების შემთხვევაში გაიმართება ხელახალი კენჭისყრა (მეორე ტური).
დღის წესრიგის თანახმად, კონფერენციამ უნდა აირჩიოს სადისციპლინო და ადმინისტრაციული კომიტეტის წევრები.
კონფერენციის მუშაობა იქნება საჯარო და გამჭვირვალე. მოსამართლეთა კონფერენციას დაესწრებიან საერთაშორისო და ადგილობრივი არასამთავრობო ორგანიზაციების წარმომადგენლები. კონფერენციის მიმდინარეობას მთელი დღის მანძილზე გააშუქებს ქართული და უცხოური მედია. |