|
2013 წლის 8 ივლისს, თბილისის საქალაქო სასამართლოს სისხლის სამართლის კოლეგიის განჩინებით, არ დაკმაყოფილდა პროკურატურის შუამდგომლობა, განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე, ნასამართლობის მქონე ბრალდებულ ამირან სინჯარაძის მიმართ პატიმრობის გამოყენების თაობაზე. სასამართლომ არ გამოიყენა აღკვეთის ღონისძიების არცერთი სახე და ამირან სინჯარაძე დაკავებიდან გაათავისუფლა.
წარდგენილი ბრალდების თანახმად, 2013 წლის 05 ივლისს ამირან სინჯარაძემ გამოძიებით დაუდგენელ ვითარებაში, უკანონოდ შეიძინა 2488 გრამი ნარკოტიკული საშუალება მარიხუანა, რასაც ასევე უკანონოდ ინახავდა თავის საცხოვრებელ ბინაში.
სასამართლომ შუამდგომლობის განხილვისას, დაადგინა რომ ბრალდების წარდგენისას არსებითად დაირღვა სისხლის სამართლის საპროცესო კანონმდებლობის მოთხოვნები, კერძოდ ამირან სინჯარაძისათვის ბრალად შერაცხული ქმედება სასჯელის სახით ითვალისწინებს უვადო თავისუფლების აღკვეთას და შესაბამისად პირი ექვემდებარება სავალდებულო დაცვას, რაც კონკრეტულ შემთხვევაში არ იქნა გათვალისწინებული და ამირან სინჯარაძისთვის ბრალდების წარდგენა მოხდა დამცველის სავალდებულო მონაწილეობის გარეშე. ბრალდებულის მიმართ სავალდებულო დაცვის უფლების დარღვევის გამო, ამირან სინჯარაძე გათავისუფლდა დაკავებიდან.
აღნიშნულ საქმეზე წინასასამართლო სხდომა გაიმართება 2013 წლის 14 აგვისტოს 13:30 საათზე , თბილისის საქალაქო სასამართლოში. |
მომწონს (
არ მომწონს (
