2018 წლის 19 ივლისს, ბათუმის საქალაქო სასამართლომ დააკმაყოფილა ბრალდების მხარის შუამდგომლობა და კანონიერ ქურდობაში, ქურდული სამყაროს წევრობაში და ქურდულ შეკრებაში მონაწილეობაში ბრალდებულ 11 პირს პირს - მინდია ლ.-ს, იმედა ა.-ს, ივანე გ.-ს, შოთა კ.-ს, მარად წ.-ს, ბეჟან დ.-ს, ზაალ ა.-ს, ბადრი ქ.-ს, რამაზ კ.-ს, გიორგი შ.-ს და ჯამბულ ნ.-ს აღკვეთის ღონისძიების სახით პატიმრობა შეუფარდა.
წარდგენილი ბრალის თანახმად, მინდია ლ.-ს, რომელსაც აღკვეთის ღონისძიების სახით პატიმრობა დაუსწრებლად შეეფარდა, ბრალად ედება კანონიერი ქურდობა და ქურდულ შეკრებაში მონაწილეობა.
იმედა ა.-ს, ივანე გ.-ს, შოთა კ.-ს, მარად წ.-ს, ბეჟან დ.-ს, ზაალ ა.-ს და ჯამბულ ნ.-ს ბრალად ედებათ ქურდული სამყაროს წევრობა და ქურდულ შეკრებაში მონაწილეობა, ხოლო ბადრი ქ.-ს, რამაზ კ.-ს, გიორგი შ.-ს ბრალად ედებათ ქურდული სამყაროს წევრობა, ქურდულ შეკრებაში მონაწილეობა, გამოძალვა, ჩადენილი ჯგუფურად, დიდი ოდენობით ქონების მიღების მიზნით და ჯგუფური ძალადობა.
სასამართლომ აღკვეთის ღონისძიების კონკრეტული სახის შერჩევისას, მხარეთა ახსნა-განმარტებების მოსმენის შემდეგ, მხედველობაში მიიღო ბრალად წარდგენილი ქმედების სიმძიმე, საზოგადოებრივად საშიში ხასიათი, ბრალდებულების პიროვნული მახასიათებლები და მიიჩნია, რომ არსებობდა როგორც ფორმალური, ასევე ფაქტობრივი საფუძვლები ყველაზე უფრო მკაცრი აღკვეთის ღონისძიების - პატიმრობის გამოყენებისათვის.
საქმეზე წინასასამართლო სხდომა 2018 წლის 12 სექტემბერს, 12:00 საათზე გაიმართება.
განჩინება აღკვეთის ღონისძიების გამოყენების ნაწილში შეიძლება გასაჩივრდეს ერთჯერადად, მისი გამოტანიდან 48 საათში, ქუთაისის სააპელაციო სასამართლოს საგამოძიებო კოლეგიაში.
|