მარტვილის რაიონის სოფელ ნაგვაზაოში მომხდარი მკვლელობისა და ყაჩაღობის ფაქტზე ზუგდიდის რაიონულ სასამართლოში დასრულდა სისხლის სამართლის საქმის განხილვა ბრალდებულ რ.მ-ს მიმართ, რომელსაც ბრალად შერაცხული ჰქონდა საქართველოს სსკ-ის 109-ე მუხლის მეორე ნაწილის ,,ე’’ ქვეპუნქტით და სსკ-ის 109-ე მუხლის მესამე ნაწილის ,,გ’’ ქვეპუნქტით (განზრახ მკვლელობა დამამძიმებელ გარემოებაში ჯგუფურად, ანგარებით), სსკ-ის 179-ე მუხლის მეორე ნაწილის ,,ბ’’ ქვეპუნქტი და სსკ-ის 179-ე მუხლის მესამე ნაწილის ,,ბ’’ და ,,გ’’ ქვეპუნქტებით, სსკ-ის 260-ე მუხლის მესამე ნაწილის ,,ე’’ ქვეპუნქტით და სსკ-ის 260-ე მუხლის მეექვსე ნაწილის ,,ა’’ ქვეპუნქტით და სსკ-ის 273-ე მუხლით.
ნაფიც მსაჯულთა სასამართლომ, 12 ნაფიცი მსაჯულის შემადგენლობით, კანონით განსაზღვრულ დროში - 7 საათიანი მსჯელობის შედეგად, ბრალდების სიმძიმის მზარდი თანმიმდევრობით, გამოიტანა წარდგენილი ბრალდების ნაწილზე გამამტყუნებელი ვერდიქტი, ხოლო წარდგენილი ბრალდების ნაწილზე გამამართლებელი ვერდიქტი.
სასამართლომ ნაფიც მსაჯულთა მიერ მიღებული ვერდიქტის საფუძველზე რ.მ საქართველოს სსკ-ის 260-ე მუხლის მესამე ნაწილის ,,ე’’ ქვეპუნქტით და სსკ-ის 260-ე მუხლის მეექვსე ნაწილის ,,ა’’ ქვეპუნქტით წარდგენილ ბრალდებაში უდანაშაულოდ ცნო და გაამართლა.
რ. მ ცნობილ იქნა დამნაშავედ საქართველოს სსკ-ის 273-ე მუხლით, სსკ-ის 179-ე მუხლის მეორე ნაწილის ,,ბ’’ ქვეპუნქტით და სსკ-ის 179-ე მუხლის მესამე ნაწილის ,,ბ’’ და ,,გ’’ ქვეპუნქტებით, სსკ-ის 109-ე მუხლის მეორე ნაწილის ,,ე’’ ქვეპუნქტით და სსკ-ის 109-ე მუხლის მესამე ნაწილის ,,გ’’ ქვეპუნქტით და საბოლოოდ სასჯელის სახედ და ზომად განესაზღვრა თავისუფლების აღკვეთა 18 (თვრამეტი) წლის ვადით და ჯარიმა 3000 (სამი ათასი) ლარი სახელმწიფო ბიუჯეტის სასარგებლოდ.
|